بعد موتي

انثري اوراق شعري
فوق قبري
بعد موتي
بلل تراب المقابر بالدموع
احضن اطياف الرحيل بلا رجوع
سامحيني
حلليني
اذكريني حب ساكن بالضلوع
بعد موتي
احضري ليلة رحيلي
شاركيهم في غسيلي
لاتغيبي علميهم من تكوني
قولي انك ساكنه دائم عيوني
وانك اعذب من تخوني
واني اول من سكن باقصى حشاه
واني اصدق من جرح قلبه جفاه
علميهم يتركوني بين يدك
بس حدك
بس حدك
تتركيني
احضنيني
بس مره
حطي خدي فوق صدرك
فوق جرحك
فوق غدرك
علميهم
كيف عشنا الحب اهاته وهمه
كيف ذبنا واحترقنا
يوم هذا الوقت قاسي مايهمه
مايهمه
علميهم
كيف هذا العمرمايعرف يحن
وعلميهم كم سهرت الليل من جرحك ائن
علمي امي مكانك بين قلبي
علميها انك اجمل من لقيت
كان هذا الحب غلطه
انتي احلى ماخطيت
بعدها يااجمل ايام العذاب
واول اخر حب عشته في غياب
احملي نعشي معاهم للقبور
وادفنيني قلب حبك
ومالقى غير التجافي والغرور
بعد موتي
عيشي ايامك سعاده مع سرور
جعل دنيا انتي فيها كلها فرح ٍ ونور
واذكريني
رجل حبك و ماتمنى
غير لقيا بالحلال
تعرفيني
ماهو اللي يوم مع غاده وباكر مع منال
والرذيله مامشت رجلي عليها
ولو نوت
يحرم علي لبس العمامه والعقال
اذكريني
واحدٍ كان اقصى احلامه
ينام بخافقك
عاشق ٍ ذاق اقسى الامه
واحدٍ حبك وحبك موت موت
وافي ٍ اخلص بحبه لين ضم الموت
كنتي اصدق من عرف من كل هاذولي البنات
وكنتي اعذب من ذبح قلبه وهده لين مات
كنتي عن كل العذارى غير غير
كنتي لقلوب الحيارى حب خير
وكنتي ليه
حلم وردي
صيفي بردي
اييه يااحلى ايام العمر
سنين من عمري تمر
وانتي انتي
باقيه ذيك العيون
اللي خذتني يمها
عشت العمر في همها
وماهمها
ذاك الطريح
اللي من احلى يدها اصبح جريح
تصدقين
حتى وأنا في اخر ايامي بموت
شايلٍ همك معاي
وش تسوي بعد موتي
ياترى تلقى حبيب
يودها
ياهل تراه ايحبها
تستغربين
لو قلت لك ماهمني
كل اللي اتمنى بعد موتي
حياةٍ تسعدك
عن كل هم ٍ تبعدك
حتى لو ان اللي معك
انسان دائم اكرهه
دامه يحبك مايهم
ياسيدي تامر وسم
عندي رجا بس اطلبه
مابين قلبك والحشا
حطي مكان ٍ لي صغير
تتذكريني لاقسى
وقتك وهدك هالزمان
يامنبع بحور الحنان
بستسمحك
راحل انا
عن دنيتك
لاوالذي عطر وجمل سيرتك
ماهو بيدي
ابعد عن عيونك وروح
لكن قدر في وسط لوح
اني اموت بدنيتي
بس مرتين
مره بليله التقت
عيني بعينك وابتدا
حبن كبير
والثانيه هذا المسا
يومي مشيت
مثواي هذا الاخير
وبالمرتين
كنتي معي